Dua Lipa dhe Puma janë në bashkëpunimin e tyre të parë.
Pasi u emërua vjeshtën e kaluar si ambasadorja e markës, Dua dhe Puma po nxjerrin një koleksion me një emër shqip, që është “Flutur”, i cili vjen si një surprizë shumë e bukur për publikun shqiptar. Koleksioni i frymëzuar nga vitet ’90 do të përfshijë katër pjesë në stilet e veshjeve dhe këpucëve dhe përmban një logo të re që kombinon logon e Puma-s me një flutur.
“Për mua, fluturat janë më shumë se thjesht krijesa të bukura”, tha Lipa në një deklaratë. “Ato përfaqësojnë shumë, si transformimin, shpresën dhe metamorfozën. Gjatë vitit të kaluar, flutura është bërë veçanërisht simbolike dhe kuptimplotë për mua.”
Po pse Puma ka përzgjedhur pikërisht fjalën shqiptare? Me siguri, si sugjerim i Dua Lipës, yllit kosovar që po shndrin në skenat botërore të muzikës pop, që do të jetë edhe imazhi zyrtar i këtij koleksioni. Këngëtarja ka shpërndarë në profilin e saj zyrtar fotografi të ndryshme e veshur me koleksionin e ri, duke njoftuar se ai do të hidhet në treg më 18 dhjetor, diçka e pohuar edhe në faqen zyrtare të Puma.
