Elbasan- Një incident i rëndë është regjistruar pasditen e të enjtes në një fshat të thellë malor në bashkinë e Elbasanit, ku 45-vjeçari Josif Kavaja ka qëlluar me armë drejt policisë, e cila kishte shkuar për kontroll në banesën e tij ku ai jeton i vetëm prej disa vitesh.
Pas incidentit që ka zgjatur disa minuta, 45-vjeçari ka kërcënuar efektivët se nëse tentojnë të ndërhyjnë, ai do të qëllonte drejt tyre. Incidenti ka ndodhur në lagjen Harxov në fshatin Seltë të Njësisë Administrative Zavalinë e Elbasanit.
Pamjet e para nga vendi i ngjarjes, shihet prania e policisë si dhe mjetet e forcave të rendit.
Aty policia kishte shkuar për kontroll banese, me vendim Gjykate pas denoncimeve se 45-vjeçari dispononte armë zjarri pa leje të cilën e përdorte shpesh. Në momentin që Policia ka mbërritur në banesën e tij, në tentativë për t’i shpëtuar uniformave blu, 45-vjeçari ka qëlluar me armë zjarri tip Kallashnikov në drejtim të tyre duke u rrezikuar seriozisht jetën, por nga të shtënat me armë nuk ka patur të lënduar.
Burime jo zyrtare bënë me dije se 45-vjeçari më pas ka mundur të largohet në drejtim te masivit pyjor ku është fshehur. Policia i ka bërë thirrje të vetëdorëzohet por ai nuk ka pranuar të dorëzohet, ndërsa shfaqej mjaft i acaruar. Paraprakisht konfirmohet se 45-vjeçari vuan nga probleme të shëndetit mendor, që nga koha e kthimit nga emigracioni.
