KRUJË – Kryeministri Edi Rama nuk i kurseu thumbimet për demokratët teksa ishte në Bubq për të përuruar banesat e reja të dëmtuara nga tërmeti i 26 nëntorit 2019. Ai tha se demokratët do ta kujtojnë kur të hapin bravat e dyerve të shtëpive. Gjithashtu, Rama shtoi se do t’u qëndrojë si hije demokratëve gjithmonë për t’i ndihmuar.
“Më vjen mirë se demokratët do hapin bravën dhe do më kujtojnë mua. Pastaj do më shajnë në shtëpitë e veta. Do thonë s’bëri ndonjë gjë, kushedi sa ka vjedhur. E ke 3 dhoma e një kuzhinë, me sa e doje me 30 dhoma?! Më tha një drejtor i shkollës, shkolla jonë ka më pak banjo se e gjitha komuna e Bubqit.
Jam këtu për të mos iu ndarë demokratëve si hije, ama jo hije për keq, hije që kur rrëzohesh vjen aty dhe të jep dorën. Sa më të sigurta bravat!”, u shpreh Rama.
