TIRANË– Kryetari i Partisë Demokratike Lulzim Basha ka ndarë në Twitter raportin e Birn për pasurinë e ministrave të kabinetit Rama aty ku thuhet se 2/3 e kabinetit kanë probleme me justifikimin e pasurisë.
Basha shkruan se ministrat e tij kanë trefishuar pasurinë e tyre ndërkohë që papunësia është rritur. Kreu i PD-së thotë se tani është koha për një qeveri që kujdeset për qytetarët, dhe jo për veten.
‘Ndërsa ekonomia po rrënohet çdo ditë, papunësia rritet dhe varfëria është ulur këmbëkryq në familjet e shqiptarëve, Rama dhe ministrat e tij kanë trefishuar pasuritë e tyre!!! Rama dhe qeveria e tij kujdesen vetëm per vete. Mjaft është mjaft! Është koha për ndryshim, është koha për një qeveri që kujdeset për qytetarët, dhe jo për veten.
Të dhënat e analizuara nga BIRN tregojnë se 18 nga 27 anëtarët e kabinetit të kryeministrit Edi Rama nga viti 2013 deri në vitin 2018, kanë probleme me justifikimin e pasurisë në të paktën një vit të karrierës së tyre si shërbyes publikë.
