Për më shumë se 3 orë ekspertët e opozitës paraqitën para deputetëve, raportin e tyre për reformën territoriale. Pas ideve të hedhura paraprakisht, opozitarët zyrtarisht propozojnë që të shtohen 33 bashki të reja, krahas 61 ekzistuese, mes të cilave rikthimi i disa bashkive të shkrira në 2014.
Sipas propozimit, në qarkun Berat shtohen 2 bashki, në Dibër 4, në Durrës 2 bashki, në Elbasan 3, në qarkun Fier 4, Korçës i shtohen 5 bashki, Kukësit 2, Lezhës 4 dhe Vlorës 4 bashki të reja. Qarku më i madh i vendit, Tirana sipas ekspertëve të PD duhet të ketë 3 Bashki më shumë, Farkë, Dajt e Kashar. I pandryshuar mbetet qarku i Gjirokastrës dhe Shkodra, vendim të cilin e argumentojnë si dëshirë të qytetarëve.
Sa i përket kalimit të ndarjes së vendit në rajone, opozitarët lënë të hapura 2 opsione, ose 3 rajone, ose 6. Por një ndarje e re, sipas ekspertëve të opozitës duhet të shoqërohet me hapa të tjerë reformues të pushtetit vendor, mes të cilave edhe krijimi i një ministrie për pushtetin vendor apo mundësia për referendume lokale.
‘Çfarë rekomandojmë? Modeli i pushteti vendor. Bazuar në analizën tonë rekomandojmë që Shqipëria të vazhdojë të mbajë qeverisje vendore me dy nivele dhe të përforcojë qeverisjen me shumë nivele. Organizimi territorial I nivelit të parë, riorganizimi i bashkive aktuale, dhe krijimin e bashkive të reja; Për nivelin e dytë të pushtetit vendor, skenari parë nga 12 qarqe në 6 qarqe të mëdha, që do i hiqet emri dhe të kalohet në emërimin rajon, dhe version dytë nga 12 qarqe në 3 rajone; Shqipërisë i duhet ligji për referendumet lokale; Dyfishim të transfertës së pakufizuar që i jepet bashkive pra nga 1 % që është në 2%; Për bashkinë e kryeqytetit, duhet një status të veçantë; Qeveria të rikthejë ministri të dedikuar për pushtetin vendor.’- tha Haxhimaili.
Menjëherë këto propozime hasën kundërshtinë e kryetares socialiste të komisionit Anila Denaj.
‘Keni të dhëna kontradiktore. Në ndarjen territoriale, sesi do zgjidhet problemi i përfaqësimit, me këto mekanizma ligjorë që kemi, nuk erdhi. Rajonet duhen diskutuar, por nuk do të guxoja të thoja një numër, pa një studim të detajuar nga ekspertët.’- tha Denaj.
Replikën e mori nga bashkëkryetarja demokrate, Dhurata Çupi
‘Kemi qartësuar në detaje se çfarë i shërben qytetarëve shqiptarë.’- shpreh Çupi.
Vetë socialistët ende nuk kanë bërë propozim për ndarjen e re të vendit, të cilin gjithsesi do ta prezantojnë javën e ardhshme, por për ta kurrsesi nuk mund të ketë një shtim kaq të lartë të numrit të bashkive sa propozon opozita.
PROPOZIMI I PD PËR SHTIMIN E BASHKIVE
QARKU BERAT (SHTOHEN 2 BASHKI)
1- Bashkia Shpirag
2- Bashkia Otllak
QARKU DIBËR (SHTOHEN 4 BASHKI)
3- Bashkia Maqellarë
4- Bashkia Kastriot
5- Bashkia Lurë
6- Bashkia Shupenzë
QARKU DURRËS (SHTOHEN 2 BASHKI)
7- Bashkia Sukth
8- Bashkia Fushë-Krujë
QARKU ELBASAN (SHTOHEN 3 BASHKI)
9- Bashkia Shpat
10- Bashkia Bradashesh
11- Bashkia Lunik
QARKU FIER (SHTOHEN 4 BASHKI)
12- Bashkia Levan
13- Bashkia Dushk
14- Bashkia Ardenicë
15- Bashkia Fratar
QARKU KORÇË (SHTOHEN 5 BASHKI)
16- Bashkia Voskopojë
17- Bashkia Leskovik
18- Bashkia Drenovë
19- Bashkia Pojan
20- Bashkia Starovë
QARKU KUKËS (SHTOHEN 2 BASHKI)
21- Bashkia Shishtavec
22- Bashkia Bicaj
QARKU LEZHË (SHTOHEN 4 BASHKI)
23- Bashkia Bregu I Matës
24- Bashkia Orosh
25- Bashkia Zadrimë
26- Bashkia Milot
BASHKIA TIRANË (SHTOHEN 3 BASHKI)
27- Bashkia Farkë
28- Bashkia Kashar
29- Bashkia Dajt
BASHKIA VLORË (SHTOHEN 4 BASHKI)
30- Bashkia Kotë
31- Bashkia Novoselë
32- Bashkia Orikum
33- Bashkia Ksamil
