TIRANË– Kryeministri Edi Rama ka vizituar sërish mëngjesin e sotëm familjen e 25-vjeçarit Klodian Rasha, i cili u vra nga një efektiv i Forcave Shqiponja, pasi nuk iu bind urdhrit për të ndaluar.
Tre makina të eskortës së Ramës ndaluan para rrugicës ku banon familja Rasha. Kjo vizitë e kreut të qeverisë vjen një ditë pasi qeveria akordoi një pension special prej 61 mijë lekësh për këtë familje. Babai i 25 vjeçarit Klodian Rasha, Qazim Rasha e cilësoi këtë veprim si vrasje për herë të dytë të të birit.
Rasha është shprehur për mediat se e mirëpret sa herë të dojë në shtëpinë e tij Ramën mirëpo kërkon drejtësi nga shteti.
‘Kryeministri Edi Rama ka ardhur dy herë personalisht në shtëpinë time. E kam mirëpritur dhe do ta mirëpres sa herë të mendojë për të ardhur për të më ngushëlluar në familjen time. I kam kërkuar kryeministrit, zoti kryeministër kam kërkuar që nga dita e parë drejtësi dhe vetëm drejtësi. Nëse kryeministri im më jep drejtësinë e djalit që të qetësohet shpirti i atij atje, por të qetësohen dhe zemrat e mia, zemrat e gjithkujt që e ndiejnë fëmijën tim si djalin e tyre, ky është vlerësimi, ky është kompensimi, kjo është gjithçka. ‘-është shprehur babai i të ndjerit.
Nuk dihet ende se për çfarë mund të ketë biseduar Rama me familjen e 25 vjeçarit, Klodian Rashës.
