Austria kufizon ndjeshëm jetën e të pavaksinuarve, mes rritjes së nivelit të infektimeve. Nga kjo e hënë, vetëm personat e vaksinuar apo që janë shëruar nga COVID-19 mund të shkojnë në restorante, kafene, të marrin pjesë në evente më shumë se 25 persona apo të kenë një jetë normale sociale.
Testi negativ i COVID-it nuk do të jetë më i mjaftueshëm e nuk do të barazohet më me certifikatën e gjelbër. Masa nis të zbatohet pas gati 10 mijë rasteve të shënuara në fundjavë. Vetëm 64 për qind e austriakëve janë të vaksinuar, një prej niveleve më të ulëta ky në Europën perëndimore
“Nga e hëna vetëm personat e shëruar apo të vaksinuar plotësisht do të mund të hyjnë në restorante, hotele, facilitete mjekësore, spitale apo qendrat e kujdesit për të moshuar. Qëllimi është të nxisim vaksinimin dhe të reduktojmë ndjeshëm numrin e personave të pavaksinuar”, deklaroi kancelari austriak Alexander Schallenberger.
Me një situatë të ngjashme përballet edhe Gjermania ku niveli i infektimeve me koronavirus kapi rekorde të reja. Vendi ka regjistruar 201.1 raste për 100 mijë banorë gjatë javës së fundit, duke tejkaluar rekordin prej 197.6 rastesh në dhjetor të vitit të kaluar.
Edhe pse shifrat janë më të ulëta se në vende të tjera europiane, kambanat e alarmit po bien për atë që është quajtur pandemia e të pavaksinuarve. Vetëm 67 për qind e popullsisë prej 83 milionë banorësh është imunizuar në Gjermani, ku ndryshe nga shtete të tjera europiane autoritet nuk e kanë bërë të detyrueshme vaksinën për asnjë grup profesional.
