Rishi Sunak është emëruar sot kryetar i Partisë Konservatore të Britanisë së Madhe, duke siguruar kështu postin e kryeministrit të ardhshëm të këtij vendi. Pas mandatit jashtëzakonisht të shkurtër të Liz Truss, disa janë skeptikë për ardhjen e Sunak në pushtet, megjithëse është e pamohueshme se ai është një person interesant.
Ai është kryeministri më i ri në Britaninë e Madhe që nga viti 1812, njeriu që përparoi më shpejt nga parlamentar në kryeministër dhe që erdhi në pushtet me pasuri më të madhe se ajo e mbretit. Përveç kësaj, Sunak një bir emigrantësh, është i pari aziatik që emërohet Kryeministër i Britanisë së Madhe.
Kur Sunak të shpallet Kryeministër i Britanisë së Madhe, për herë të parë banori i 10 i Downing Street do të jetë më i pasur se monarku në Pallatin Buckingham. Sunak dhe gruaja e tij Akshata Murthy kanë një pasuri të kombinuar prej rreth 835 milionë €, afërsisht dyfishi i pasurisë së vlerësuar të mbretit Charles III dhe bashkëshortes së Mbretëreshës Camilla.
Sunak këtë vit u bë politikani i parë që përfshihet në listën e njerëzve më të pasur në Britaninë e Madhe nga revista “Sunday Times”.
Sunak, gruaja dhe dy vajzat e tij, Krishna dhe Anushka, kalojnë pjesën më të madhe të javës në shtëpinë e tyre me pesë dhoma gjumi në Kensington, në perëndim të Londrës. Kjo pronë vlen rreth tetë milionë euro.
Kjo pasuri dhe ngurrimi i Sunak për ta shfaqur atë, i shtyn disa njerëz të pyesin nëse ai është shumë i pasur për të kuptuar problemet e përditshme të votuesve.
Paratë, të cilat vijnë në masë të madhe nga gruaja e tij, vajza e një miliarderi indian të softuerit, ishin objekt bisede gjatë fushatës së fundit të lidershipit.
Puna e tij e parë ishte në bankën “Goldman Sachs”. Ai u takua me gruan e tij të ardhshme ndërsa të dy studionin në Universitetin e Stanfordit.
Sunak vazhdimisht refuzoi t’u përgjigjej pyetjeve se sa para kishte dhe ku ishin investuar. Ai thotë se mendon që votuesve nuk u intereson nëse ai kishte veshur një kostum Henry Herbert prej 3500 £ ose këpucë Prada teksa vizitonte kantieret e ndërtimit gjatë fushatës: “Vlerat janë ato që janë të rëndësishme, ajo që vesh është e parëndësishme”, tha ai.
Sunak është deputet që nga viti 2015. Në korrik 2019, ai u emërua kryesekretar i Thesarit, pasi kishte hyrë në shërbimin civil si ministër i Pushtetit Vendor në janar 2018. Më pas u emërua kancelar i Thesarit në vitin 2020, detyrë që e mbajti deri në korrik 2022.
