Cristiano Ronaldo ka bërë të ditur se djali që ai dhe Georgina Rodriguez prisnin ka ndërruar jetë gjatë lindjes. Ylli i futbollit ndau pak minuta më parë një deklaratë të përbashkët me partneren në Instagram.
“Me pikëllimin tonë më të thellë duhet të njoftojmë se djali ynë ka ndërruar jetë. Është dhimbja më e madhe që mund të ndiejë çdo prind. Vetëm lindja e vajzës sonë na jep forcën për ta jetuar këtë moment me pak shpresë dhe lumturi. Ne dëshirojmë të falënderojmë mjekët dhe infermierët për kujdesin dhe mbështetjen e tyre si ekspertë. Jemi të shkatërruar nga kjo humbje dhe me mirësjellje kërkojmë privatësi në këtë periudhë kaq të vështirë. Djali ynë, ti je engjëlli ynë, do të duam gjithmonë”, kanë shkruar ata.
Ronaldo dhe Rodriguez njoftuan në tetor se ishin në pritje të binjakëve, një djali dhe një vajze. Ai është gjithashtu baba i katër fëmijëve, binjakëve Eva Maria dhe Mateo, djalit të madh Cristiano Jr. dhe më e vogla Alana Martina, të cilën e ka me Rodriguez.
