Ditën e sotme po zhvillohet seanca dëgjimore për hartën e re gjyqësore. Deputetja demokratike Dhurata Çupi tha se kjo çështje nuk duhet të politizohet.
“Asnjë nuk ka gjykatë Apeli, nuk duhet ta politiziojmë, deputetët e majtë kanë të njëjtin shqetësim, por nuk e shprehin në media. Rama ka thënë që kjo hartë, do miratohet siç është, ashtu edhe Manja, ky i fundit është i tepër të dëgjohet se e ka thënë që nuk heq dorë nga kjo, institucionet e pavarura që kanë marrë këto vendime, nuk kanë pasur asnjë deklaratë që të kundërshtojnë këtë çështje”, tha Çupi.
Në fjalën e tij, deputeti Gazment Bardhi i ka kërkuar KLGJ që të japë argumente bindës që kjo hartë e re gjyqësore nuk është një vendim politik i Edi Ramës. Kjo deklaratë e tij vjen pas reagimit të kryeministrit Edi Rama, i cili tha se bojkoti nuk ka vlerë dhe se harta nuk ka për të ndryshuar.
“Duhet një reagim i KLGJ, vë në pikëpyetje seriozitetin e pavarësisë së KLGJ, kur nuk reagon kur kryeministri politizon vendimmarrjen e tij, e kur ka avokatë në protestë e KLGJ nuk e shqetëson kolapsin gjyqësor, bie në përfundimin që qeveria ka bërë këtë vendim dhe KLGj thjesht ka certifikuar vendimin e tyre”, tha Bardhi.
Aktualisht Shqipëria ka 6 apele në të gjithë vendin dhe reduktohet në një Apel kombëtar ndërsa 13 do të jetë numri i gjykatave të shkallës së parë nga 22 që është aktualisht. Me vendimin e ri shkrihen gjykatat në Tropojë, Krujë, Lushnje, Pogradec, Mat, Përmet, Kurbin, Kavajë, Pukë.
