Tiranë- Policia e Tiranës ka reaguar pas videove dhe lajmeve që u shpërndanë në rrjet, ku u tha se sherri kishte ndodhur mes reperëve Finem dhe Don Xhoni.
Reagimet ishin të shumta nga të dy reperët, ku Don Xhoni emri i të cilit është Xhonatan Isufi u shpreh në Instagram se nuk ka qenë pjesë e këtij sherri dhe se marrëdhëniet me Finemin, i ka shumë të mira. Ndërkohë Finem, Klejdi Dogjani është djali që në video shfaqet me bluzë ngjyrë rozë duke shkelmuar dhe grushtuar personin që ndodhej brenda makinës, as e mohoi dhe pohoi këtë ngjarje duke u shprehu se nuk i kujtohet kush ka qenë personi në video, pasi sherre të tilla ndodhin çdo natë.
Sherri i dhunshëm ndodhi më 13 nëntor të vitit të kaluar në kryqëzimin e rrugës “Xhanfize Keko”, ndërkohë që video e sherrit qarkulloi para dy ditësh në rrjetet sociale. Burime zyrtare bënë me dije se materialet iu referuan Prokurorisë pranë Gjykatës së Shkallës së Parë Tiranë, për shtetasit Doris Senka, Matteo Petaj dhe Malvin Dogjoni, banues në Tiranë. Ata akuzohen se janë konfliktuar me shtetasit Gianluca Shkoza, Mateo Caka dhe Klejdi Degjoni, banues në Tiranë.
Në lidhje me këtë ngjarje ka reaguar një prej protagonistëve të këtij sherri, që në këtë rast është personi i dhunuar, që shfaqet në video ku disa djem të rinj i gjuajnë me shkelma dhe grushte. Bëhet fjalë për këngëtarin Santi, i cili përmes një video deklaron se është ai i përfshirë në videon e publikuar.
“Sapo jam larguar nga emisioni më kanë zënë pritë dy makina, pa dijeninë time, më kanë rrahur, nuk është turp, tek pullë me u rraf nga 10 veta sa ishin ata. Arsyeja që nuk kam reaguar është se nuk kam dashur të marr vëmendje, emër apo të bëhesha lajm. Të nesërmen më ka marrë vëllai dhe menaxheri i Finem për të tërhequr denoncimin. Këto kanë ndodhur për një video në Tik-Tok, arsyeja më banale. Denoncimin e kam tërhequr meqë e mbyllëm muhabetin dhe video nuk do dilte kurrë. Arsyeja që është postuar kjo video, është duke parë famën e Don Xhonit në çdo rrjet social, kanë dashur ta shfrytëzojnë për vëmendje. Më keni sqaruar 3 muaj përpara, por pabesisht, si jo burra. Sot po reagoj jo për vëmendje, por për një padrejtësi. Do ju ndjek penalisht që prej momentit që ka dalë video, kam fakte, mesazhe. Nëse doni vëmendje ua jap unë.”, tha ai.
