Brazili është bërë vendi i dytë më i prekur nga pandemia e COVID-19 pasi është vendi i dytë në botë që ka regjistruar më shumë se 500 mijë vdekje për shkak të koronavirusit, pas Shteteve të Bashkuara të Amerikës.
Ministria e Shëndetësisë e Brazilit regjistroi një numër rekord infektimesh prej 115,228 të koronavirusit në 24 orët e fundit. Tashmë Brazili ka marrë vendin e Indisë si epiqendra e re e infektimeve të koronavirusit në botë.
Ndërkohë që situata në Evropë dhe Amerikën Veriore ka filluar të përmirësohet falë një procesi të sukseshëm vaksinimi, numri i rasteve të infektimeve në Brazil dhe pjesën tjetër të Amerikës Latine kanë vazhduar të rriten nga dita në ditë.
Shtetet e Amerikës Latine kanë zhvilluar një proces të ngadaltë vaksinimi gjatë të cilit vetëm 12% e popullsisë është vaksinuar dhe kufizimet ndaj pandemisë së COVID-19 nuk janë respektuar nga shumica e popullsisë, gjë që ka çuar në përkeqsimin e situatës në rajon dhe krijimin e një epiqendre të re për koronavirusin.
