Një ekip i shkencëtarëve gjermanë besojnë se kanë zbuluar pse disa njerëz që kanë marrë vaksinat AstraZeneca dhe Johnson & Johnson, kanë pësuar mpiksje të gjakut – dhe pretendojnë se mund t’u tregojnë prodhuesve, se si të përmirësojnë vaksinën për ta shmangur këtë.
Të dhënat paraprake të këtij studimi tregojnë se proteinat Spajk që mbështjellin koronavirusin dhe që i mundësojnë hyrjen në qeliza, shpesh bashkohen ose ndahen.
Ndodh që ato të përhapen nëpër trup dhe në raste të rralla, sistemi imunitar përpiqet t’i neutralizojë duke krijuar mpiksje të mëdha gjaku që bllokojnë venat, çka mund të çojë deri në vdekje.
Shkencëtarët konstatojnë se rreziku i përhapjes së proteinave Spajk nëpër trup, është më i lartë pas injektimit të vaksinave që përdorin viruse të dobësuar të ftohjes, të njohur ndryshe si Adenoviruse. Aktualisht po punohet për gjetjen e një mënyre për të shmangur reagimin e tepruar të sistemit imunitar, që të mos krijohen mpiksjet e gjakut, duke përmirësuar metodologjinë e punës së këtyre vaksinave.
AstraZeneca dhe Johnson & Johnson kanë një proces më të shpejt prodhimi, dhe kanë shkurtuar kohën e imunizimit masiv të popullatës.
Mpiksjet e gjakut janë të rralla, por shqetësuese në grupmoshën më të re, e cila është më e rrezikuar nga mpiksja dhe ka më pak të ngjarë të përjetojë simptoma të rënda nga Covid. Britania e Madhe tani po u ofron kujtdo nën moshën 40 vjeç një zgjedhje të vaksinave, aty ku është e mundur. Ka pasur 309 raste në Mbretërinë e Bashkuar nga 33 milionë njerëz që kanë marrë vaksinën AstraZeneca.
