Presidenti i habitur brazilian Bolsonaro filmon veten në pompën e benzinës në Mbretërinë e Bashkuar ndërsa ndan tronditjen e tij për çmimin e karburantit gjatë vizitës për funeralin e Mbretëreshës
Presidenti i Brazilit, Jair Bolsonaro është kthyer në një fenomen në rrjetet sociale, teksa e ka shfrytëzuar udhëtimin e tij në Mbretërinë e Bashkuar për funeralin e Mbretëreshës Elizabeta II për të ndarë tronditjen e tij me çmimin e lartë të benzinës në ishull. Bolsonaro u ndal në një pikë karburanti në Londër dhe postoi një video në lidhje me koston e karburantit duke dashur t’i thotë brazilianëve që ata paguajnë shumë herë më pak.
Teksa qëndroi në një pikë furnizimi të “Shell” në Bayswater Road, presidenti kontrovers i Brazilit vuri në dukje tabelën elektronike që tregonte çmimin 161.9 p për një litër benzinë. Në një video të filmuar me celular, Bolsonaro tha se kostoja është “praktikisht dyfishi i mesatares së shumë shteteve braziliane” dhe gjithashtu pretendoi se karburanti në Brazil është ndër më të lirët në botë.
“Unë jam këtu në Londër, Angli, dhe çmimi i benzinës është 1.61£, kjo është rreth 9.70 R$ për litër. Benzina jonë është në fakt, ndër më të lirat në botë”, pohoi ai.
Videoja u postua në internet një natë para funeralit të Mbretëreshës. Disa komentues në mediat sociale kritikuan pretendimin e Bolsonaro dhe thanë se nuk është një krahasim i drejtë pasi paga minimale e Brazilit është shumë herë më e ulët se ajo e Britanisë.
Presidenti i Brazilit ka trumbetuar një rënie të çmimit të karburantit, ndërsa ai përpiqet të fitojë zgjedhjet e muajit të ardhshëm. Sondazhi i fundit nga IPEC tregon se ish-lideri Luiz Inacio Lula da Silva është përpara Bolsonaros, me 47% kundrejt 31%.
