Lufta në Ukrainë nuk ndalet dhe tmerret të tjera dalin nga qytetet e shkatërruara nga bombardimet ruse.
BE është gati të nisë sanksionet e reja, ndërkohë që konflikti po përhapet në planin diplomatik, ku Italia ka dëbuar edhe 40 anëtarë të përfaqësisë ruse. Po ashtu një raund i ri sanksionesh do të vendoset ndaj bankave dhe zyrtarëve rusë nga SHBA dhe aleatët e saj pasi Moska u akuzua për kryerjen e krimeve të luftës në qytetin ukrainas Bucha.
Sekretarja e shtypit e Shtëpisë së Bardhë, Jen Psaki, tha sot se sanksionet e reja do të rrisin kufizimet ndaj institucioneve financiare dhe ndërmarrjeve shtetërore në Rusi dhe do të synojnë zyrtarët e qeverisë ruse dhe familjet e tyre.
Prokurorja e Përgjithshme e Ukrainës, Irina Venediktova, pretendon se ushtria ruse në Ukrainë ka kryer dhunë seksuale jo vetëm ndaj grave dhe burrave, por edhe ndaj fëmijëve dhe të moshuarve.
Presidenti ukrainas Volodymyr Zelensky vuri në dyshim efektivitetin e Këshillit të Sigurimit të OKB-së. “Këshilli i Sigurimit i OKB-së ekziston dhe megjithatë nuk ka siguri në botë për askënd,” tha Zelensky. Ai vuri në dukje se “betejat më të vështira” janë ende duke u zhvilluar në Donbas dhe Kharkiv. Zelensky përsëriti gjithashtu thirrjen e tij për largimin e Rusisë nga Këshilli i Sigurimit i OKB-së.
Ndërkohë në Radekhiv, një qytet që ndodhet rreth 70 km larg Lvivit, në Ukrainën perëndimore, u dëgjuan shpërthime. Kreu i administratës ushtarake rajonale Maksym Kozitskii i kërkoi popullsisë të qëndronte e strehuar.
