“ Shqipëria është ngritur mes plagëve e dhimbjeve, për t’u bërë gjithmonë e më e fortë se më parë!“ Shkruan deputeti Vullnet Sinaj në përkujtimin e tij në rrjetet sociale për tragjedinë e Otrantos, ku humbën jetën 81 persona dhe 24 u zhdukën.
Sinaj përkujton atë muaj tragjik për popullin shqiptar, të incidentit fatal të anijes Kateri i Radës të nisur nga porti i Vlorës, e cila u përplas nga anija ushtarake italiane Sibilla në kanalin e Otrantos më 28 mars 1997.
Ja çfarë shkruan deputeti Sinaj:
“24 vite nga një prej ngjarjeve më të dhimbshme: Tragjedia e Otrantos!
Në atë muaj mars tragjik për popullin shqiptar, bilanci do të rëndohej me incidentin fatal të anijes Kateri i Radës të nisur nga porti i Vlorës, e cila u përplas nga anija ushtarake italiane Sibilla në kanalin e Otrantos më 28 mars 1997.
81 viktima dhe 24 të zhdukur. Të nisur me shpresën për një jetë më të mirë e më të sigurt përtej detit, në një kohë kur vendi ynë po lëngonte nga ajo mbrapshtësi e paprecedentë!
Në përkujtim të personave që humbën jetën në këtë tragjedi, si dhe ndaj të afërmve të tyre!🙏💐
Shqipëria është ngritur mes plagëve e dhimbjeve, për t’u bërë gjithmonë e më e fortë se më parë!🇦🇱
