TIRANË– Seanca e parashikuar për ish-ministrin e Brendshëm Saimir Tahiri dhe ish-drejtorin e Policisë së Vlorës, Jaeld Çela, është shtyrë. Shkak është bërë mungesa e avokatëve të ish-drejtorit të policisë, Çelës. Një prej avokatëve tha se mungonte për shkak të një problemi shëndetësor, ndërsa tjetri se ishte në një seancë gjyqësore në Lezhë. Gazetarja Klodiana Lala, raportoi mëngjesin e sotëm për ‘Balkanweb’ se gjyqtari Gentian Romani është gjobitur me 5 mijë lekë të reja për shkak të mungesës së tij.
Trupa gjykuese do të kryesohet nga Daniela Shirka dhe dy anëtarët Engert Pëllumbi dhe Igerta Hysi
Mësohet se seanca e radhës është parashikuar të mbahet më 5 janar. Ish-ministri Saimi Tahiri, mbërriti rreth orës 9:25 në ambientet e Gjykatës së Posaçme dhe doli prej saj rreth orës 9:40. Tahiri nuk dha asnjë koment për mediat duke u larguar së bashku me avokatin e tij mbrojtës.
Disa javë më parë, Gjykata e Lartë zbardhi vendimin për ish-ministrin duke regjistruar çështjen në Gjykatën e Posaçme të Apelit për Korrupsionin dhe Krimin e Organizuar. Por kjo gjykatë vendosi rikthimin e çështjes për shqyrtim tek një trupë tjetër në GJKKO, me pretendimin se procesi ka pasur shkelje proceduriale. SPAK e akuzoi për trafik droge, por gjykata ish-ministrin e Brendshëm e dënoi vetëm për shpërdorim detyre, ndërsa me prishjen e vendimit nga Gjykata e Lartë, dosja rikthehet edhe njëherë në Apel. Tahiri u dënua me 5 vite burg, e cila iu konvertua në 3.4 vite shërbim prove.
