TIRANË– Kompozitori i shquar Avni Mula ka mbyllur sytë mbrëmjen e së enjtes, në moshën 92-vjeçare. Lajmin e hidhur e ka bërë me dije vetë e bija e kompozitorit, sopranoja e mirënjohur, Inva Mula. Përmes një shënimi në rrjetet sociale, Mula lajmëroi se artisti i madh, të cilin, ajo e quan ‘gjigant’, ka flutuar për në Valsin e Përjetësisë, referuar këtu, një prej këngëve të mirënjohura të Mulës, “Valsi i lumturisë”.
Avni Mula dha shpirt në banesën e tij, pas disa ditësh në gjendje të rëndë shëndetësore, teksa kishte filluar të mbahej vetëm nga një tub oksigjeni. Homazhet për kompozitorin e ndjerë do të kryhen nesër, nga ora 11:00-13:00, në hollin e Universitetit të Arteve, në Tiranë.
“Gjigandi ynë fluturoi në Valsin e Përjetësisë! Për një përshendetje me dorë në zemër, homazhet kryen nesër, 30 tetor, ora 11: 00-13: 00 në hollin e Universitetit të Arteve, Tiranë. Avni Mula 04.01.1928 – 29.10.2020,”- shkruan Mula.
Humbja e madhe u pasua nga reagime të shumta në media e rrjet, nga miq, politikanë dhe familjarë të Mulës. Nipi i tij, Osman Mula rrëfeu se nuk e kishte takuar dot për herë të fundit, pasi gjendja e tij shëndetësore ishte rënduar. Zhani Çiko, tregoi me zemrën plot, se i madhi Avni Mula, nuk është larguar me pengje nga kjo botë.
Ardit Gjebrea, kujtoi dosa nga realizimet që Mula la pas. Ndërsa politikanët, kryeministri Edi Rama, kryeopozitari Lulzim Basha dhe kryebashkiaku Erion Veliaj, shprehën ngushëllime për familjarët pas ngjarjes së rëndë.
Avni Mula është i dyti nga familja që ndahet nga kjo botë. Ai ka humbur gruan e jetës, Nina Mulën, rusja bukuroshe që la vendlindjen pasi njohu dashurinë e saj në Moskë, Avniun. Nina jetoi dhe vdqi si shqiptare, në vitin 2011, larg familjes së saj dhe larg të ftohtit të Rusisë, por shumë pranë familjes që kishte krijuar me kompozitorin e shquar. Të dy, patën dy vajza, Inva dhe Adelina, të cilat gjithashtu kanë ndjekur rrugën e artit.
Një kompozitor i shquar shqiptar. Avni Mula lindi në Gjakovë të Kosovës, më 4 janar të vitit 1928. Për kontributin e tij, Mula ka marrë disa nga medaljet më të larta të vlerësimit nga qeveria shqiptare, dekoratën e Artistit të Popullit të Shqipërisë dhe dekoratën Nderi i Kombit. Studimet e larta muzikore, Avni Mula i kreu në Konservatorin “Çajkovski” të Moskës (1952-1957), ku u diplomua si këngëtar lirik.
Karrierën artistike, ai e nisi pas kthimit nga Moska si solist në Teatrin e Operës dhe Baletit, duke realizuar role kryesore të repertorit operistik të kohës, përmes së cilave u dallua për nivelin e lartë të zgjidhjeve muzikore-skenike. Përmendim këtu, realizimet e figurës së Figaros te “Berberi i Seviljes” të Rosinit, Onjeginit tek “Eugjen Onjegin” të Çajkovskit dhe Gjetës tek “Mrika” e Prenk Jakovës.
Avni Mula zhvilloi një aktivitet të pasur koncertal brenda dhe jashtë vendit. Ai njihet si autor i veprave të mëdha vokale-koncertale, kantata, poema vokale dhe skenike, ku veçohen opereta “Karnavalet e Korçës” dhe opera “Borana”. Firmën e tij mbajnë edhe shumë këngë të muzikës së lehtë, mes të cilave “Valsi i lumturisë”.
