Xhensila Myrtezaj ishte e pranishme mbrëmjen e kaluar në emisionin “E ardhmja është vajzë”, ku zbuloi disa të pathëna për jetën e saj. Një prej gjërave që ajo nuk flet thuajse kurrë është divorci i prindërve. Por mbrëmë, ndërsa tregoi mes emocionesh si nisi rrugëtimi i saj artistik, Xhensila rrëfeu se muzika ka qenë shpëtimi i saj në periudhën e vështirë që kaloi pas ndarjes së tyre.
“Muzika më ka shpëtuar shpirtërisht, nga ana psikologjike. Ka qenë një dhuratë e jashtëzakonshme për mua. Mami ma ka falur, edhe Zoti, sepse mami ka qenë këngëtare. Mbaj mend që kur fikeshin dritat mami më ushtronte zërin dhe këndonim pafund bashkë. Në çdo moment ishim të dyja bashkë, përveç momentit të festës së abetares”, tha Xhensila, duke shtuar se talentin e saj në muzikë e kishte zbuluar mësuesja e muzikës kur ka qenë në klasën e pestë.
Këngëtarja tregoi se ka një lidhje shumë të fortë me të ëmën, që shpreson ta ketë edhe ajo me Ajkën.
“Ajka është kupola e gjithçkaje. Unë kisha shumë projekte dhe plane, por sapo Ajka erdhi në jetë, erdhi në krye dhe i rrëzoi të gjitha. Kam një raport shumë të shenjtë me mamin tim dhe uroj të kem të njëjtin dhe me Ajkën. Po rritet në një familje me shumë dashuri. Besi është një baba shembullor“, përfundoi Xhensila.
Gjatë mbrëmjes nuk munguan as lotët për Xhensilën, e cila u surprizua nga një videomesazh i Besit.
