Presidenti Volodymir Zelensky ka paralajmëruar Perëndimin se Vladimir Putin nuk do të ndalet pasi të ketë pushtuar Ukrainën.
“Ne do të jemi të parët. Ju do jeni të dytët. Sa më shumë të hajë kjo bishë, dëshiron më shumë, shumë më shumë”, tha ai.
44 vjeçari e përshkroi Ukrainën si një ‘zonë të lirisë’ që duhej të ruhet.
“Sot, lufta është këtu. Nesër do të jetë në Lituani, pastaj në Poloni, pastaj në Gjermani. Kjo është serioze. Shtetet e Bashkuara janë larg, por ditët e fundit, unë mendoj se janë më afër nesh”, u shpreh Zelensky.
Ish-komediani doli të hënën nga bunkeri i tij në Kiev dhe u kthye në pallatin presidencial, duke deklaruar: “Unë jam këtu, nuk fshihem dhe nuk kam frikë nga askush.”
“Ne thoshim se e hëna është një ditë e vështirë. Por është luftë në vendin tonë, kështu që çdo ditë është një ditë e vështirë”, tha ai me shaka.
Ai iu drejtua popullit, duke thënë: “Ne jemi të gjithë në vendet tona duke punuar, aty ku duhet të jemi. Ekipi im është në Kiev me mua. Ne të gjithë po luftojmë, të gjithë po kontribuojmë në fitoren tonë, e cila me siguri do të ndodhë”.
Zelensky foli edhe për bisedën që zhvilloi me Biden gjatë intervistës dhe bëri apel për një zonë ndalim fluturimi: “I thashë se për ne, gjëja më e rëndësishme sot është siguria në qiell. Ne nuk mund të lejojmë që Rusia të jetë aktive aty, sepse ata po na bombardojnë, po dërgojnë raketa, helikopterë, avionë luftarakë – shumë gjëra. Ndërsa ne nuk po kontrollojmë dot qiellin tonë. Jam i sigurt se presidenti mund të bëjë më shumë. Jam i sigurt se mundet.”
