TIRANË– Kryeministri Edi Rama i është përgjigjur paraardhësit të tij Sali Berisha e opozitarëve që thirrjet e tij për nisje hetimesh i konsideruan si sulm ndaj Prokurorisë së Posaçme Kundër Korrupsionit dhe Krimit të Organizuar (SPAK) për shkak të hetimeve të nisura ndaj magjistratit Ardian Dvorani. Në dy postime të njëpasnjëshme në Twitter, Rama shkruan se për të e Partinë Socialiste, SPAK punon për 100 vite pa anshmëri. Kreu i qeverisë këmbëngul se krimet shtetërore nuk mund të tolerohen më, duke përsëritur thirrjet e bëra paraditen e sotme, për hetime ndaj Berishës e Presidentit Ilir Meta.
“Të qeshësh e të qash me lot! Paskam kërcënuar SPAKUN sipas nongratave që betoheshin se edhe Flota e Shtatë Amerikane po t’i drejtonte tytat nga Lalzi nuk do ta votonin Reformën në Drejtësi! Për mua e për #PS SPAKU rron e punon pa gajle 100 vjet dhe bujrum, derën tonë e ka hapur! Por gojën nuk kemi për ta mbyllur, që SPAKU të mos godasë njëanshmërisht, po gjithanshmërisht! Roli i mumjes, përballë rreshtit të gjykatësve e të prokurorëve, që Vetingu i nxorri katran me bojë apo mbi dosjet e skandaleve legjendare të krimit shtetëror, nuk mund të tolerohet më!”- shkruan Rama.
Rama ashpërsoi tonet ndaj SPAK gjatë asamblesë së Përgjithshme të Partisë Socialiste dhe kërkoi që prokuroria e Posaçme të niste hetimet jo vetëm ndaj Berishës, thirrje që e ka bërë më herët, por edhe ndaj Presidentit Ilir Meta. Për këtë të fundit, Rama tha se e gjithë Shqipëria e do para SPAK, sidomos pas hetimit të nisur ndaj ish-kreut të Këshillit të Lartë të Drejtësisë, Ardian Dvorani. Ky i fundit, sipas kreut të qeverisë u bë se ashtu donte Meta. Kjo deklaratë ka sjellë edhe reagime nga Opozita. Berisha shkruante se Rama sulmon SPAK, pasi ky i fundit po heton Dvoranin dhe millionat që ka fshehur magjistrati.
