Një incident ka ndodhur paraditen e sotme në Pavijonin e Pediatrisë në QSUT. Ndërkohë që në dhomë ndodheshin fëmijë të shtruar, mbi njërin prej tyre ka rënë suvaja e tavanit duke i shkaktuar dëmtime të lehta pacientit të vogël.
Suvaja ka rënë pikërisht në pjesën mbi krevatin e fëmijës së shtruar, por për fat të mirë nuk ka shkaktaur dëmtime të mëdha. Ky i fundit ndodhet nën kujdesin e mjekëve.
Në një reagim të mëvonshëm QSUT shprehet se po bën verifikimet e duhura për të kuptuar shkakun e rënies së suvasë dhe nxjerrjen e përgjegjësve për situatën e krijuar.
Deklaratë për Media
Një incident ka ndodhur sot paradite në Shërbimin e Pediatrisë së Specialiteteve 1 në QSUNT, në pavionin ekzistues, si pasojë e shkëputjes së një pjese suvaje nga tavani i një dhome.
Menjëherë personeli mjekësor ka ekzaminuar dy pacientët e vegjël që ndodheshin në dhomë dhe gjendja e tyre aktualisht paraqitet e mirë, pa dëmtime.
Një grup ekspertësh nga Drejtoria e Shërbimeve Mbështetëse e QSUNT, po kryen një vlerësim teknik për shkaqet e incidentit për marrjen e masave të menjëhershme.
