Vlorë- Deputeti Vullnet Sinaj ditën e djeshme në kuadër të takimeve elektorale ka qenë prezent në Kocul ku është takuar me një ndër intelektualët më të spikatur vlonjatë, Tanush Shaska ish-rektor i universitetit “Ismail Qemali”, aktualisht profesor i asociuar në departamentin e Matematikës në universitetin e Miçiganit në SHBA.
“Përkushtimi , por mbi të gjitha ndershmëria profesionale janë rruga e duhur në jetë“, është mesazhi që deputeti Sinaj ka dhënë nga Koculi në takimin e mbajtur me ish- rektorin e universitetit të Vlorës.
“I nderuar të kem në krah një qytetar kurajoz, intelektual i mirëfilltë, profesonist dhe kontributor i spikatur i shkencës botërore. Të dy bij të kësaj treve, ai me origjinë nga Koculi dhe unë nga Armeni i jemi përjetë mirënjohës tokës dhe paraardhësve, që na mbrujtën me vlerat tipike të Labërisë. Sot pamë të dy një mbështetje të jashtëzakonshme popullore, një bashkim përtej çdo krahu dhe simpatie politike! Të bindur se vetëm energjia pozitive që lind nga puna e ndershme do të transformojë pozitivisht këtë zonë, ishim sot në krah të njëri-tjetrin për të dhënë një mesazh kuptimplotë. Mesazhin e bashkimit. Shpeshherë në takime të ndryshme me banorë të Vlorës e vë theksin tek mbështetja popullore për mandatin e tretë të PS , përtej çdo përkatësie partiake. Jam i bindur se projektet në punë e sipër nga kjo shumicë, ndihmojnë në përmirësimin e cilësisë së jetës së gjithë komunitetit, siç thuhet, përtej të majtës e së djathtës. Tanush Shaska është një ndër intelektualët më të spikatur vlonjatë, ish-rektor i universitetit “Ismail Qemali”, aktualisht profesor i asociuar në departamentin e Matematikës në universitetin e Miçiganit në SHBA. Njerëz të tillë janë shembull e model pozitiv se si puna, përkushtimi por mbi të gjitha ndershmëria profesionale janë rruga e duhur në jetë. Të dy bashkë, do të përpiqemi për t’ja shpërblyer më së miri kësaj treve fisnike që na bëri burra. Faleminderit Profesor!
Për të mirën e Shqipërisë. Lulzim Basha mund të mos jetë njeri i keq, por ai nuk është i zoti të vendosë në partinë e tij. Nuk ka shans ta lerë Sali Berisha të drejtojë i pavarur. Atëherë unë pyes, kur je i pamundur të drejtosh e rregullosh shtëpinë tënde politike, si pretendon ta ndreqësh Shqipërinë?! Nuk është koha për lojëra dhe eksperimente. Mandati i tretë i Partisë Socialiste dhe i kryeministrit Edi Rama është votë përgjegjësie për punët në vazhdim. Rindërtimi do të kryhet i plotë dhe vaksinimi masiv është një përgjigje serioze ndaj pandemisë. Këto objektiva mund t’i bëjë realitet vetëm Partia Socialiste.” – shkruan deputeti Sinaj në postimin e tij.
