Kryeministri Edi Rama i është përgjigjur akuzave të shumta se qeveria nuk po kryen testime dhe koronavirusi po përhapet me shpejtësi. Në fjalën e tij nga hapja e kantierit të parë në lagjen “5 Maji” për Rindërtimin, Rama përmendi rastin e Francës që prej ditës së djeshme ka rikthyer masat kufizuese.
Sipas Ramës, askush nuk e ndalon infeksionin, pavarësisht numrit të testimeve, dhe shtoi se qeveria është e qartë me atë që bën por ngre pyetjen se “kush janë politikanët që të vendosin sa testime do bëhen?”
“Kur thotë ndalojmë infeksionin? Bëj testime më shumë thotë që të ndalosh infeksionin! Po mirë pse nuk e ndalon Franca infeksionin, që është vendi i parë sot për numrin e testimeve. Pse se ndaloi Gjermania?
Pse nuk e ndaloi askush infeksionin se i bënë më shumë apo më pak testime?! Dhe kush jemi ne, kush jam unë, kush është ai, kush janë politikanët që vendosin sa testime do bëhen?!
Kush janë, ne thjesht dhe vetëm kemi detyrimin t’ju përgjigjemi atyre që janë në krye të detyrës, që t’u bindemi, t’i dëgjojmë dhe të në tregojnë se çfarë duhet të bëjmë.
Dhe jo ti torolisim dhe ti ngatërrojmë me lloj-lloj budallallëqesh, duke nxjerr në skenë njerëz që s’kanë lidhje me këtë situatë të ngatërruar. Qeveria është e qartë dhe di se çfarë bën”, u shpreh Rama.
