Themeluesi i WikiLeaks, Julian Assange do të martohet me Stela Moris në ambientet e një burgu të sigurisë së lartë në Londër, të mërkurën.
“Sot është dita ime e dasmës. Do të martohem me dashurinë e jetës sime. Burri im i ardhshëm është babai i dy djemve tanë, ai është një njeri i mrekullueshëm, inteligjent dhe me humor, ai e ka të thellë ndjenjën e drejtësisë, di të ndajë të drejtën e të gabuarën, dhe është i njohur në mbarë botën për punën e tij si botues i guximshëm. Sot në drekë, do të kaloj nëpër portat e burgut më roje të sigurisë së lartë dhe do të martohem me një të burgosur politik, themeluesin e WikiLeaks, Julian Assange”, tha partnerja e Assange-it, Stela Moris. Julian Assange dhe Stela Moris do kryejnë një ceremoni të vogël martesore ku pjesëmarrës do të jenë dy dëshmitarë dhe dy roje sigurie.
Assange kërkohet nga autoritetet amerikane për t’u përballur në gjyq me 17 akuza në lidhje me publikimin e një numri të madh dokumentesh konfidenciale ushtarake dhe diplomatike amerikane, në faqen WikiLeaks, ku është bashkëthemelues. 50-vjeçari, i cili mohon se ka keqbërje në veprimet e tij, është mbajtur në burgun Belmarsh në Londër që nga viti 2019. Më parë ka qëndruar në ambasadën e Ekuadorit në Londër, për shtatë vjet, derisa Ekuadori i hoqi nënshtetësinë për shkak të një sërë mosmarrëveshjesh midis tij dhe autoriteteve ekuadoriane.
Assange kërkoi mbrojtje nga ambasada për të shmangur ekstradimin në Suedi, për t’u përballur me akuzat për abuzim seksual. Ai i mohoi akuzat me pretendimin se po përdoren si pretekst për ekstradimin e tij nga Suedia në SHBA, ku e pret përballja me 17 akuzat në gjyq. Pas prishjes së marrëveshjes me Ekuadorin, policia e Londrës e arrestoi në ambientet e ambasadës, për shkeljen e afatit të lirimit me kusht 7 vite më parë, gjatë një tjetër beteje ligjore.
Gjykata e Lartë të Britanisë në dhjetor të 2021 vendosi që Assange mund të ekstradohet në SHBA, duke përmbysur vendimin për të mos lejuar ekstradimin e tij, vendim i cili ishte marrë për shkak të shqetësimit për shëndetin mendor të Assange-it, si edhe rrezikut për vetëvrasje.
Assange-it iu mohua e drejta këtë muaj për të apeluar në Gjykatën e Lartë të Britanisë kundër vendimit për ekstradimin e tij në SHBA. Megjithatë, ai ende mund ta kundërshtojë këtë vendim. Julian Assange dhe Stela Moris janë partnerë që prej vitit 2015. Ndërsa Assange jetonte në ambasadë, ata bënë dy fëmijë. Ceremonia martesës do të zhvillohet gjatë orëve të vizitës në burg.
