Tirana kërkon me ngulm sulmues. Pas lajmit që Majkëll Ngo do të operohet në gju dhe do të mungojë të paktën tetë javë nga dita e operimit, te bardheblutë po mendojnë për afrimin e një sulmuesi.
Ka qenë vetë trajneri Orges Shehi, i cili i ka kërkuar presidentit Refik Halili të afrojë të paktën një sulmues me eksperiencë. Prej dëmtimit të Majkëll Ngosë po shihet për të plotësuar dëshirën e Shehit. Është e sigurt që anglezi nuk do të luajë deri në fund të marsit, sido që të shkojë situata e tij e riaftësimit. Tirana po hedh sytë në Maqedoni, në Mal të Zi ose Kosovë si merkatoja e vetme nga ku mund të merren lojtarë të mirë.
OPSIONI ABAZAJ – Një tjetër mundësi ku Tirana mund të përqendrohet është ajo e Kristal Abazajt.
Ky i fundit vazhdon të jetë një dëshirë e Tiranës, ndërsa tani bardheblutë kanë një sulm me mungesa dhe në janar ata duan të afrojnë lojtarë me peshë, siç bënë me Taulant Seferin në 2021-shin. Në fakt, Abazaj është dëshirë e kahershme e Halilit që e kërkoi edhe në korrik ta afronte te Tirana, por më pas lojtari u dëmtua dhe gjërat u ngrinë. Tani që situata e dëmtimit është përmirësuar, Tirana del në skenë. Si presidenti dhe trajneri Shehi e duan lojtarin, që mes të tjerave është edhe tifoz i Tiranës dhe disa herë është parë në stadium.
Lojtari aktivizohet në kampionatin turk me Istanbulsporin që militon në Ligën e Parë. Edhe pse Tirana ka afruar shumë lojtarë cilësorë këtë verë, një afrim i Abazajt do të thoshte që bardheblutë të ishin skuadra bombë në Shqipëri.
Lojtari u dëmtua në gusht në gju dhe më katër shtator u operua me sukses. Ai pritet të kthehet në fushë gjatë shkurtit, por mund të ketë edhe një afrim më të shpejtë. Gjithsesi, është herët për të folur, sepse Abazaj në fillim duhet të riaftësohet dhe më pas të lejohet nga Istanbulspori.
