ELBASAN- Tre viktima, trupat e zhdukur e të cilët dyshohet se i ka marrë lumi Shkumbin, 3 të plagosur mes të cilëve 1 fëmijë në intubim është bilanci tragjik i aksidentit të rëndë që u shënua mëngjesin e sotëm në aksin rrugor Elbasan-Librazhd, ku një automjet me 6 persona është përplasur me një tjetër makinë tip “Ford” dhe për pasojë drejtuesi ka humbur kontrollin duke përfunduar në lumin Shkumbin.
Sipas informacioneve, zjarrfikësit kanë arritur të shpëtojnë tre prej personave të përfshirë në aksident, mes tyre edhe një fëmijë, ndërsa tre të tjerë rezultojnë të zhdukur. Dyshimet janë të forta se tre të zhdukurit mund të kenë humbur jetën, por ende nuk janë gjetur trupat e tyre.
Mes të plagosurve është dhe një fëmijë i cili po transportohet drejt Tiranës në intubim në gjendje të rëndë.
Përplasja mes automjeteve mendohet të ketë qenë shumë e fortë. Makina e cila humbi kontrollin, pasi “shqeu” barrierat mbrojtëse ka përfunduar duke u rrokullisur në greminë deri në lumë.
Zjarrfikëset po punojnë për gjetjen dhe identifikimin e trupave, “fati” i të cilave ende nuk dihet.
