FIER- Një 3-vjeçar ka ndërruar jetë disa ditë më parë në kopësht, ngjarje që tronditi opinionin publik. Lidhur me ngjarjen e rëndë, fillimisht u raportua se sipas punonjësve të kopshtit, i mituri ishte mbytur me lidhësen e kapuçit të xhupit teksa po përpiqej që të merrte çantën e varur. Edhe pse në këto momente, i mituri duhet të ishte i supervizuar, sërish është lënë i lirë të merrte çantën në dollapin e mëposhtëm. Por kur ka tentuar të zbresë kapuçi i ka ngelur në varëse, diçka që duket thuajse e pamundur duke marrë parasysh strukturën e objektit.
Ndërkohë që lidhur me ngjarjen është vënë në pranga edukatorja kujdestare e të miturit, Redina Binjaku, e cila sot është lënë në masën e sigurisë “arrest me burg” nga Gjykata e Fierit. Sipas edukatores, më kohën që ora po shkonte 13 dhe babai do të paraqitej në kopësht për të marrë fëmijën, ajo e kishte bërë gati dhe e kishte lënë afër vendin ku do merrte çantë. Por ishte larguar pasi një fëmijë tjetër nga grupi i saj po qante, e në këtë moment kishte shkuar brenda në klasë për të parë se çfarë kishte ndodhur me fëmijën tjetër. Kur u kthye gjeti të varur tek varësja ku fëmijët linin xhupat dhe çantat.
Por skandali është se kopshti privat është hapur sërish që dje, pa kaluar as java nga tragjedia, e asnjë masë nuk është marrë ndaj subjektit. Po ashtu, fillimisht u pretendua se në ambientet e brendshme ka kamera sigurie, por mesa duket asnjë nuk e ka kapur momentin tragjik të të miturit. Familja e prindërit e këtij të fundit kërkojnë drejtësi, duke protestuar para godinës së Prokurorisë së Fierit, ndërsa kërkojnë dënim maksimal për përgjegjësit.
Në një rrëfim mes lotësh, nëna e djalit të mitur që ndërroi jetë, tregon para kamerave se ishte edukatorja e kopshtit që e mori në telefon për ngjarjen, duke e gënjyer se djali ishte mirë, por doktorët i kishin treguar se 3-vjeçari kishte shkuar në spital pa shenja jete.
