Berat- Një ngjarje e pazakontë ka ndodhur mbrëmjen e kaluar në qytetin e Beratit. Dy të rinj janë arrestuar nga policia, pasi kanë dalë jashtë shtëpisë gjatë orës policore. Por në momentin që policia i ka ndaluar ka patur përplasje fizike.
Sipas policisë bëhet me dije se dy të rinjtë kanë kundërshtuar me dhunë uniformat blu.
Njoftimi i policisë
Kundërshtuan me dhunë punonjësit e Policisë, arrestohen në flagrancë 2 shtetas. Nga specialistët e Seksionit për Krimet u bë arrestimi në flagrancë i shtetasve: A. F., 21 vjeç dhe E. A., 27 vjeç, të dy banues në lagjen “Donika Kastrioti”, Berat. Këta shtetas kanë qenë duke qarkulluar në rrugë mbrëmjen e djeshme gjatë orarit të ndalimit të lëvizjes, në kundërshtim me Aktin Normativ dhe në momentin që janë konstatuar nga shërbimet e Komisariatit të Policisë Berat, i kanë kundërshtuar ata me dhunë. Materialet u referuan në Prokurorinë pranë Gjykatës së Shkallës së Parë Berat, për veprën penale “Kundërshtimi i punonjësit të policisë së rendit publik.
