Pas arrestimeve të SPAK të 9 zyrtarëve të lartë të Ministrisë së Brendshme të akuzuar për korrupsion me tenderin e uniformave të policisë, Partia Demokratike, kërkoi që hetimet të shkojnë më lart deri te ish-ministri Sandër Lleshaj dhe ish-sekretari i Përgjithshëm Platent Ndreca, i zgjedhur së fundmi deputet i PS-së.
Për Ndrecën u kërkua edhe arrestimi.
Pas ish-ministrit të Brendshëm, Sandër Lleshaj, edhe Ndreca këtë të hënë ka folur dhe ka “larë duart” nga afera 25 milion euro, e cila u planifikua dhe u realizua në kohën që ata drejtonin këtë ministri.
“Ndjeva keqardhje, nuk është lajm që është i pëlqyeshëm, që u hiqet liria disa funksionarëve. Ndjeva trishtim. Sa i përket aspektit ligjor është një akt që duhet përshëndetur. Duhet të jemi të përmbajtur në deklarimet publike dhe mediatike, për të mos krijuar presion tek asnjëra nga palët në proces. Nga pikëpamja kushtetuese ata persona janë ende të pafajshëm”, tha Plarent Ndreca për emisionin “Breaking”. Pasi gazetarja e ka pyetur Ndrecën nëse bëhet tenderi pa firmën e ministrit apo sekretarit të Përgjithshëm, ai është përgjigjur “po”. Gjithsesi ai pranoi se kishte dijeni për tenderin, por jo për çdo hap procedurial.
Pjesë nga intervista:
Gazetarja: A bëhet tenderi pa firmën e ministrit apo Sekretarit të Përgjithshëm?
Ndreca: Patjetër që bëhet. Agjencia është e pavarur. Është një cikël i mbyllur.
Gazetarja: PD iu përmend edhe ju, edhe ministrin e brendshëm.
Ndreca: PD nuk di t’i lexojë rezultatet e zgjedhjeve. Vazhdon me historitë me karakter krejtësisht politik. Të njëjtën gjë bëri edhe Alibeaj, që fatkeqësisht është edhe jurist. Vazhdojnë me metodën e vjetër. Qytetarët janë të ngopur me këto deklarime.
Ndreca u shpreh se kishte dijeni për tenderin, por jo për çdo hap procedurial. Kujtojmë që ditën e djeshme edhe Sandër Lleshaj në një intervistë tha se ministri nuk ka pasur asnjë rol në këtë tender.
