Dëshira për të mos qenë hipoktit dhe për mos të kërkuar nga qytetarët rusë që të protestojnë kundër Putinit, ndërkohë që vetë ishte jashtë Rusisë, i ka kushtuar një kritiku të Kremlinit një dekadë burgim.
Bashkëshortja e Vladimir Kara-Murza, i cili ka shtetësi britanike dhe ruse, bëri me dije se ai është vënë nën pranga disa ditë pas zbarkimit në Moskë muajin e kaluar.
“Ai nuk donte t’u kërkonte njerëzve të protestonin kundër rregjimit të Presidentit Putin nga jashtë vendit. Nuk u përpoqa ta pengoja atë nga kthimi në Rusi sepse e di se për çfarë po lufton ai. Ai është një njeri i ndershëm dhe e di se do të ishte frikacak dhe hipokrit, nëse do të qëndronte diku i sigurt dhe do t’u bënte thirrje rusëve të vazhdonin protestat. Ai donte të udhëhiqte me shembullin e tij”, i tha ajo The Times.
Një politikan i shquar i opozitës, Kara-Murza, 40 vjeç, u zhvendos në Londër me nënën e tij kur ishte adoleshent dhe u diplomua nga Universiteti i Kembrixhit.
Ai u akuzua për përhapjen e lajmeve “të rreme” rreth veprimeve të ushtrisë ruse në Bucha dhe Mariupol lidhur me një fjalim që ai mbajti muajin e kaluar në Dhomën e Përfaqësuesve të Arizonës.
Hetuesit rusë thanë se komentet e tij qenë motivuar nga “urrejtja politike”.
Shumica e figurave të opozitës ruse kanë ikur nga vendi që kur Putini pushtoi Ukrainën dhe përshkallëzoi goditjen e tij ndaj mospajtimit. Më shumë se 15,000 vetë janë arrestuar në protestat anembanë Rusisë dhe demonstratat janë pakësuar javët e fundit.
Kara-Murza ndihmoi për të bindur ligjvënësit amerikanë të miratojnë Aktin Magnitsky, i cili lejon SHBA-në të vendosë sanksione ndaj zyrtarëve rusë të dyshuar për abuzime me të drejtat e njeriut. Ai ishte aleat i Boris Nemtsov, kreu i opozitës i vrarë pranë Sheshit të Kuq shtatë vjet më parë dhe gjithashtu punon ngushtë me Bill Broëder, bankierin britanik të investimeve dhe kritikun Putin.
