Afrikë Veriore- Pas lajmit tragjik të vdekjes së 5-vjeçarit Rayan Oram i cili mbeti i bllokuar në pus, futbollisti i Al Itihad, Abderrezak Hamdullah, ka bërë gjestin human ndaj familjes së tij.
I pikëlluar nga kjo ngjarje e rëndë dhe i shtyrë për të ndihmuar disi familjen e vogëlushit, futbollisti është ofruar për t’i blerë një shtëpi të re. Qindra shpëtues punuan pa u lodhur për pesë ditë për të shpëtuar Rayan Oram. Ekipi, disa prej të cilëve kishin gërmuar me duar, më në fund arriti tek ai dhe e nxori në sipërfaqe. Por 5-vjeçari nuk arriti dot që të mbijetojë. 31-vjeçari, i cili luajti nën drejtimin e ish-trajnerit të Anglisë, Sven-Goran Eriksson, pas një kalimi në skuadrën e Superligës kineze Guangzhou, tha:
“I shpreh ngushëllimet e mia më të thella familjes së Rayanit dhe i kërkoj Zotit t’u japë atyre durim. Kam vendosur që në emrin tim, të familjes sime dhe marokenëve ta ndihmojmë këtë familje për të sjellë sadopak gëzim në jetën e tyre, duke u dhuruar një shtëpi të mobiluar.”
5-vjeçari maroken kishte rënë në një pus në fshatin Ighran të Afrikës Veriore dhe është nxjerrë pas 5 ditësh i pajetë nga ekipet e shpëtimit. Ngjarja shkaktoi një reagim të madh në rrjete sociale ndërsa qindra njerëz u mblodhën në vendngjarje. I mituri kishte rënë në 32 metra thellësi në pus ndërsa ka qenë e vështirë ndërhyrja më herët për shkak të rrëshqitjes së dherave.
