Rreth orës 17:00 të datës 17 mars, Yuriy Nechyporenko dhe babai i tij, Ruslan, po shkonin me biçikletë për në ndërtesën e administratës së Bucha ku po shpërndaheshin ndihma.
Energjia elektrike, gazi dhe uji ishin ndërprerë dhe gjërat thelbësore ishin në mungesë në qytet, një nga të parët që u pushtua nga forcat ruse, më 24 shkurt ndërsa përparonin drejt kryeqytetit të Ukrainës, Kiev.
Yuriy dhe babai i tij shpresonin të merrnin disa ilaçe dhe ushqim. Yuriy tha se një ushtar rus e ndaloi atë dhe babain e tij në rrugën Tarasivska. Ata ngritën menjëherë duart.
Duke folur për BBC në telefon së bashku me nënën e tij, Alla, 14-vjeçari dha rrëfimin e tij për atë që ndodhi më pas. “Ne u thamë se nuk mbanim armë dhe se nuk përbënim ndonjë rrezik”, tha ai. “Pastaj babai im ktheu kokën nga ana ime, dhe atëherë ai u qëllua … Ai u qëllua dy herë në gjoks, pikërisht aty ku është zemra. Pastaj ai ra.”
Në atë moment, tha adoleshenti, ushtari e qëlloi në dorën e majtë dhe 14-vjeçari ra.
“Ndërsa isha në tokë”, tha ai, “u qëllova sërish, këtë herë në krah.” “Isha shtrirë në bark, nuk mund të shihja asgjë që po ndodhte rreth meje,” tha Yuriy.
Ushtari, tha ai, qëlloi sërish, duke synuar kokën.
“Por plumbi kaloi nëpër kapuçin tim.” Yuriy tha se ushtari qëlloi përsëri, këtë herë në kokën e babait të tij. Por Ruslan ishte tashmë i vdekur.
“Kam pasur një sulm paniku, i shtrirë aty me krahun tim të plagosur. Pashë që dora më rrjedh gjak”, tha ai.
Vetëm pas një kohe, kur ushtari shkoi pas një tanku, Yuriy u ngrit dhe vrapoi.
BBC nuk i ka verifikuar në mënyrë të pavarur detajet e rrëfimit të Yuriy-t, por provat e mizorive të kryera nga forcat ruse po shtohen ndërsa ata kishin nën kontroll Bucha dhe qytete të tjera në veri të Kievit.
Vetëm në Bucha, trupa të të vdekurve u gjetën të shtrirë në rrugë, shumë prej të cilëve me plagë të mëdha. Disa ishin qëlluar nëpër tempull, sikur të ishin ekzekutuar. Të tjerëve i kishin duart ose këmbët të lidhura pas shpine. Disa prej tyre ishin goditur qartë nga tanket.
Nëna e Yuriy, Alla, i tha BBC-së se si kishte shkuar për të parë burrin e saj pasi adoleshenti u kthye në shtëpi dhe i tregoi asaj se çfarë kishte ndodhur. Ajo mendoi se Yuriy mund të kishte gabuar dhe se Ruslan ishte i plagosur, dhe kishte nevojë për ndihmë mjekësore.
“Djali im më lutej të mos e bëja”,-tha Alla. Ai tha se do të më vrisnin edhe mua”.
Një fotografi e trupit pjesërisht të mbuluar, e marrë nga Alla dhe e ndarë me BBC, duket se konfirmon dëshminë e Yuriy. Ajo tregon një plagë me armë zjarri në anën e majtë të gjoksit, afër zemrës.
Ruslan, një avokat, ishte 49 vjeç kur u vra. Trupin e varrosën në kopshtin e shtëpisë së familjes, shkruan BBC.
Yuriy thotë se ushtari që vrau babanë e tij ishte pa dyshim një rus, i veshur me të gjelbër në uniformën e ushtarëve rusë.
“Pashë në pallton e tij fjalët “Rusi” në rusisht. Ne nuk ishim në telashe për ushtrinë, ne ishim civilë, kishim veshur fustanellë të bardhë”, shtoi ai.
Marrë dhe përshtatur nga BBC News.
