Familja e një ushtari britanik që luftonte për ushtrinë ukrainase ka treguar se ai u telefonoi në mes të natës nga vija e frontit për t’u thënë se po dorëzohej tek forcat ruse sepse kishte mbetur pa ushqim dhe municione.
Aiden Aslin, 28 vjeç u zhvendos në Ukrainë në vitin 2018 pasi ra në dashuri me një grua nga Mykolaiv, por u gjend duke mbrojtur Mariupolin kundër trupave të Vladimir Putin. Duke folur për MailOnline, vëllai i Aslin, Nathan Ëood, iu lut Kremlinit që të kujdesej për të.
“Aiden më telefonoi në orën 3 të mëngjesit dhe më tha se duhej të linin armët për shkak të mungesës së ushqimit dhe municionit. Ishte një telefonatë shumë e shkurtër pasi u ndërpremë, por unë munda ta kuptoja nga toni i zërit të tij se ai nuk ishte i lumtur.
Si familje, ne nuk duam të themi shumë, sepse mirëqenia dhe siguria e Aiden janë shqetësimi ynë kryesor, por presidenti Putin ka bërë paralajmërime të rënda për ata perëndimorë të kapur duke luftuar për ushtrinë ukrainase.
Aiden është quajtur mercenar, por kjo nuk është e vërtetë. Ai u regjistrua në ushtrinë ukrainase 4 vjet më parë dhe ka shtetësi të dyfishtë.
Nëse rusët e kanë Aiden rob, ne do të donim t’u kujtonim Konventën e Gjenevës dhe ta trajtonim atë dhe ushtarët e tjerë në një mënyrë humane dhe dinjitoze” – tha ai.
Më herët Aslin tha në një mesazh të postuar përmes një kontakti në Twitter: “Kanë kaluar 48 ditë, ne u përpoqëm të mbronim Mariupolin, por nuk kemi zgjidhje tjetër veçse t’u dorëzohemi forcave ruse. Nuk kemi ushqim dhe municion. Është kënaqësi të gjithëve, shpresoj që kjo luftë të përfundojë së shpejti” – tha ai.
