UKRAINË- Zyrtarët e Kievit kanë njoftuar se presidenti i parë i Ukrainës, Leonid Kravchuk, ka vdekur ditën e djeshme më 10 Maj në moshën 88-vjeçare.
Sipas mediave të huaja, Kravchuk udhëhoqi Ukrainën drejt pavarësisë pas rënies së ish-Bashkimit Sovjetik dhe shërbeu si presidenti i saj i parë deri në vitin 1994.
Ai ishte bashkuar me ish-udhëheqësit e Rusisë dhe Bjellorusisë në nënshkrimin e një traktati që shpërbëu zyrtarisht BRSS në dhjetor 1991. Andriy Yermak, kreu i zyrës së presidentit aktual Volodymyr Zelenskyy, konfirmoi vdekjen e Kravchuk në Telegram.
Vitin e kaluar i ishte nënshtruar një operacioni në zemër pasi 88-vjeçari kishte qenë në gjendje të keqe shëndetësore. Gjatë presidencës së tij, Kravchuk ra dakord të transferonte armët e mbetura bërthamore sovjetike në territorin ukrainas nën kontrollin rus në një marrëveshje të mbështetur nga Shtetet e Bashkuara. Partia e tij Komuniste humbi zgjedhjet presidenciale të vitit 1994 nga ish-kryeministri Leonid Kuchma.
