Endri Dumani takohet për herë të parë me mamanë e tij, pas 6 vitesh. I mituri, vetëm 12 vjeç, ka takuar nënën e tij pas riatdhesimit në Shqipëri, por ndërkohë që ajo e puthte dhe përqafonte, ai nuk reagoi në asnjë moment. Ndërkohë që nënë e bir takoheshin pas 6 vitesh, Rama i ka bërë premtimin se do t’i rikthejnë edhe vajzën, Evën, e cila nuk pranoi të rikthehej me vëllain.
“Me ndihmën e Zotit do të sjellim dhe vajzën. E di çfarë tha kur më pa, po më shihte dhe më tha: Qënke plakur!,”-tha Rama.
4 fëmijë dhe një grua janë riaatdhesuar sot në Shqipëri të evakuuarit nga kampi i Al-Holit në Siri. Bëhet fjalë për Floresha Rashën dhe tre fëmijët e saj të mitur, ndërsa bashkë me ta ishte edhe Endri Dumani. Pas 6 vitesh ai rikthehet në Shqipëri, por pa të motrën, e cila zgjodhi që të qëndrojë në kamp. Mendohet se numri total i të riatdhesuarve do të shkojë mbi 50 shqiptarë, megjithatë indentitet e tyre ende nuk janë bërë me dije. Kjo pasi sipas kryeministrit Edi Rama, nga detajet e shumta që mund të publikohen, jeta e tyre mund të vendoset në rrezik. Kreu i qeverisë, shtoi se disa prej tyre janë bashkë me familjen në kamp, dhe jo të gjithë i kanë ndryshuar pikëpamjet e tyre radikale.
