Një ngjarje e rëndë ka ndodhur dy ditë më parë në një lokal në Krujë. Syri Televizion ka siguruar videon e dhunës barbare që katër persona të maskuar dhe me armë kanë ushtruar ndaj një të riu. Sipas burimeve të Syri Tv, ngjarja ka ndodhur në një lokal pranë stacionit të policisë në Krujë. Katër persona të maskuar dhe me armë kanë hyrë në një lokal.
Nën kërcënimin e armëve ata u kanë kërkuar fillimisht klientëve të lokalit të mos lëvizin, dhe më pas kanë tërhequr një të ri në mesin e lokalit duke e rrahur barbarisht me shkop.
Pasi e kanë qëlluar disa herë dhe kërcënuar të riun në sy të klientëve, personat e maskuar janë larguar nga lokali.
Për këtë ngjarje, e cila nga pamje duket më shumë se e frikshme, ende nuk ka asnjë reagim nga policia e Krujës. Ndërkohë i riu i dhunuar mësohet se ka marrë mjekim në spital, pasi ka pasur lëndime të shumta në trup.
I riu i cili ka rënë pre e dhunës, quhet Elvis Elezi, banor i lagjes ku ka ndodhur ngjarja. Një vit me parë ka qenë pre e një sulmi me lëndë plasësë, pasi një sasi eksplosivi ju hodh në banesë, por fatmirësisht nuk shkaktoi të lënduar por vetëm dëme materiale.
I dhunuari ka qenë arrestuar vite më parë për trafik droge në Kroaci, por ka disa vjet që ka dalë nga burgu.
Aktualisht është i papunë dhe është prind i një fëmije të vogël. Policia e Durrësit nga varet dhe komisariati i Policisë Krujë deri tani nuk ka pasur asnjë lloj reagimi për këtë ngjarje.
Natën e ngjarjes disa furgonë policia kanë ardhur nga Durrësi dhe kanë kryer disa kontrolle, por deri tani asnjë i ndaluar për ngjarjen e rëndë.
