Ditën e sotme, Gjykata e Vlorës ka dhënë masën e sigurisë “arrest me burg” për Kliti Lekën, autorin e vrasjes së biznesmenit në Himarë. 53- vjeçari Leka u arrestua më 17 tetor, ditën që kreu vrasjen. Mbi të rëndojnë akuzat “Vrasje në rrethana të tjera cilësuese” dhe “Prodhim dhe mbajtje pa lejë të armëve e municioneve të zjarrit”.
Ndërkohë është zbardhur edhe dëshmia që 53-vjeçari ka dhënë para oficerëve të policisë. Leka ka treguar se vrasjen e kreu për t’i marrë apartamentet në pallatin që Niko Goro kishte ndërtuar mbi sipërfaqen e tokës që Leka i kishtë vënë në dispozicion, sipas kontratës mes dy palëve.
“…Jam me profesion radiolog, jam beqar dhe me 14 klasë. Me Niko Goron kishin rënë dakord të bënim biznes, ku unë pranova dhe kam firmosur një kontratë noteriale për vënien në dispozicion të një sipërfaqe toke prej 2650 metra katror që ndodhet në Himarë. Ndërsa Nikollaqi ka firmosur duke rënë dakort që të ndërtonte një pallat disa katësh mbi këtë sipërfaqe toke që unë disponoja dhe si këmbim ai do me jepte 3 apartamente. Dokumentat dhe marëveshjen noteriale e kam në makinë, por mjeti që unë mora me qera në Tiranë dhe që më pas e përdora në vrasje, nuk mund të hapet pasi, çelësat e makinës në ikje e sipër me vrap,i hodha brenda në det. Jam fshehur në vendin e quajtur ish-prozhektori dhe aty kam qëndruar derisa ka ardhur policia. Nuk kam bërë asnjë rezistencë kur kanë ardhur policët, por jam dorëzuar menjëherë…”-ka deklaruar Leka.
Ngjarja ka ndodhur ditën e shtunë, më 17 tetor ku në vendin e quajtur rrethrrotullimi, në Himarë, Niko Goro ka mbetur i vrarë nga Kliti Leka. I cili u kap nga policia pak orë pas kryerjes së krimit.
