Itali- Hetuesit italianë kanë gjetur gjurmë në skenën e krimit, ku dyshohet se janë vrarë Shpëtim dhe Teuta Pasho, në nëntor të 2015. Ata qëndruan rreth 10 orë në apartamentin në rrugën “Felice Fontana”, në lagjen fiorentine të Novolit, ku jetonte më parë Elona Kalesha, 36-vjeçarja shqiptare, e akuzuar për vrasjen e çiftit Pasho dhe futjen e trupave të tyre në katër valixhe.
Hetuesit thonë se do të inspektohen gjurmët e gjetura, natyra e të cilave do të përcaktohet nga hetimet që do të kryhen në laboratorët në Romë. “Rezultatet do të përcaktojnë nëse ato janë gjurmë të dobishme për qëllimet e hetimit“, informojnë burimet policore.
Kalesha u arrestua me urdhër të prokurores Ornella Galeotti me akuzat e vrasjes, fshehjes dhe dhunimit të kufomave.
Hetuesit dyshojnë se bashkëshortët Pasho u vranë në shtëpinë që ndodhet në rrugën “Felice Fontana”, ku Shpëtimi dhe Tauta po qëndronin në atë kohë tek ish e dashura e djalit të tyre, Taulantit.
Ka dyshime se Elona nuk ka vepruar e vetme në krim, por me ndihmën e bashkëpunëtorëve të tjerë. Thashethemet e pakonfirmuara flasin për dy të dyshuar të tjerë, të cilët aktualisht janë të lirë.
