TIRANË– Jurgen Duka ka ndërruar jetë mëngjesin e sotëm në Tiranë për shkak të plagëve të marra në trup. 29-vjeçari është përfshirë në një konflikt me armë zjarri me një person tjetër në rrugën Irfan Tomini, në kryeqytet. Konflikti mes të rinjve nisi mbrëmjen e djeshme. Dyshohet të ketë nisur për shkaqe të dobëta, pasi dy personat dyshohet se ishin në gjendje të dehur.
Viktima pasi u qëllua me armë, u dërgua në spital për të marrë ndihmën mjekësore, mirëpo fatkeqësisht nuk ia doli dot të mbijetonte. Ende nuk dihet se kush është autori i ngjarjes.
Tiranë/Informacion paraprak
Me datë 14.12.2021, rreth orës 00:20, në rrugën “Irfan Tomini”, shtetasi J.D. (M)., është konfliktuar me një person ende të paidentifikuar.
Personi ende i paidentifikuar ka qëlluar me armë zjarri ku ka mbetur i plagosur shtetasi J. D. (M)., rreth 29 vjeç. Si pasojë e plagëve të marra, shtetasi J. D. (M)., ka ndërruar jetë në Spitalin Universitar të Traumës.
Shërbimet e Policisë kanë kaluar menjëherë në vendngjarje, dhe Grupi hetimor, nën drejtimin e Prokurorisë ka sekuestruar prova materiale që shërbejnë për të identifikuar autorin e ngjarjes.
Janë marrë në pyetje shoku i shtetasit J. D. (M)., dhe persona të tjerë në vendngjarje.
Vijon puna për identifikimin e kapjen e autorit.
