VLORË– Një ngjarje e rëndë ka ndodhur në orët e para të mëngjesit të sotëm në fshatin Babicë të Vlorës, ku një 25-vjeçar, identiteti i të cilit ende nuk dihet është gjetur i vrarë brenda makinës së tij.
I riu është gjetur pa shenja jete në një zonë të thellë në fshatin Babicë, brenda automjetit që drejtohej prej tij, tip “Fiat Punto” me targa TR 3437 R. Pas verifikimeve rezulton se makina është në pronësi të një vajze.
25-vjeçari është qëlluar 3 herë me armë zjarri nga autorët, por plumbi që ka marrë në zonën e kokës, i ka shkaktuar vdekjen e menjëhershme.
Trupi i të riut ndodhet në morgun e spitalit në qytetin e Vlorës, ku pritet që familjarët të bëjnë identifikimin e tij. Por si u gjet trupi i tij? Kanë qenë banorët e Babicës që kanë dëgjuar të shtëna me armë zjarri dhe të alarmuar, njoftuan menjëherë Policinë e Shtetit. Me të mbërritur në vendngjarje u zbulua trupi i pajetë i të riut që kishte ndërruar jetë.
