Deputeti i PD, Enkelejd Alibeaj ka folur për amnistinë fiskale duke thënë se grupi parlamentar ka qëndrim të unifikuar për të, po ashtu dhe pasaportat e arta.
Sipas tyre, këto nisma të qeverisë që i hapin rrugë kriminalitetit në vend.
“Është e papranueshme për ne amnistia fiskale, ky është qëndrimi ynë i unifikuar. Po ashtu të njëjtin qëndrim kemi për pasaportat e arta, kjo është shitja e nënshtetësisë shqiptare,” tha Alibeaj.
Sa i përket primareve që po zhvillon Berisha për zgjedhjet lokale 2023, Alibeaj tha: “PD ka strukturat e saj, modusin e saj të përcaktuar në statut e rregullore, për këto përgjigjem unë”.
I pyetur nëse rrezikojnë përsëritjen e 6 marsit pasi nuk arritën që të merrnin fitore në asnjë bashki, Alibeaj tha: “Armiku kryesor është Rama, bazuar në moral, konsistencë e koherencë të qendrimeve politike kjo është mënyra më e mirë. Si mundet Edi Rama? Me gjithë shqiptarët e ndershëm, të punës të cilëve u është rënë në qafë, zëri i të cilëve asnjëherë nuk ka kumbuar.”
Ndërsa për takimin me Lulzim Bashën dhe përfaqësues të PD, u shpreh se gjatë kësaj jave do të ketë takime ndërsa strukturat e PD, kryesia dhe Këshilli Kombëtar do të përgatiten për zgjedhjet lokale.
