Zjarrfikësit paralajmërojnë protestë: Qeveria na i ka marrë jetët peng!
Sindikata e Punonjësve të Mbrojtjes nga Zjarri dhe Shpëtimi ka ngritur shqetësimin se kërkesat e tyre legjitime për pagesat e orëve të natës, po zvarriten pafund nga qeveria.
“Heronjtë e heshtur” nuk do të heshtin më, paralajmërojnë protestë!
Reagimi i Sindikatës së PMZSH:
“Durimi nuk mund të zgjasë përgjithmonë!
Nisur nga veprimet dhe mosveprimet e disa personave, të cilët vazhdojnë të punojnë në dëm të shërbimit zjarrfikës, që kthejnë dhe rikthejnë VKM-të, duke krijuar vonesa të pajustifikueshme në dëm të gjithë shërbimit zjarrfikës, Sindikata e PMZSH shpreh indinjatën më të madhe.
Indinjatë e cila përforcohet nga mungesa e të ardhurave financiare, të punonjësve të shërbimit zjarrfikës.
Një pakënaqësi është mos-pagesa e orëve të natës, megjithëse kjo kërkesë u kalua me aprovim në mbledhjen në Ministrinë e Brendshme.
Por edhe mos-miratimi i VKM nr.350 nga qeveria, përbën një prej pakënaqësive të cilat nuk mund të anashkalohen më.
Na japin kafshatën e bukës, por na kanë marrë jetët peng!
Theksojmë se kjo indinjatë, shumë shpejt do të ngrihet në një nivel tjetër!
