Presidenti Ilir Meta e quajti një akt kriminal dhe të dënueshëm zjarrin që ra mbrëmë te “Sarajet”, një godinë e shpallur monument kulture në kryeqytet. Meta tha se kjo metodë është përdorur rëndom vitet e fundit për t’i hapur udhën ndërtimit të kullave, “lavatriçeve të pastrimit të parave” në kryeqytet.
“Babëzia e shfrenuar e betonit në Tiranë ka shkatërruar shumë monumente historike, tradicionale, kulturore dhe objekte të rëndësisë së veçantë, ndërkohë edhe ato pak të mbetura rrezikohen të zhduken përgjithmonë. Gjenocidi kulturor, barbaria ndaj identitetit tonë kombëtar dhe kushdo që luan me zjarrin për përfitim personal në dëm të interesit publik, meriton të ndëshkohet me të gjithë ashpërsinë e ligjit”, tha presidenti.
Ai i bëri thirrje Prokurorisë, SPAK dhe institucioneve të tjera ligjzbatuese përgjegjëse që të marrin çdo masë efektive për hetimin me transparencë dhe nxjerrjen para drejtësisë penale të autorëve, frymëzuesve dhe përfituesve të kësaj veprimtarie kriminale.
