Hulumtimet e reja po tregojnë se një dietë e pasur me fruta dhe perime të freskëta gjithashtu mund të jetë e mirë për mendjen, veçanërisht për fëmijët në rritje.
Hulumtimi i publikuar në BMJ Nutrition, Prevention dhe Health tregon se konsumimi i më shumë frutave dhe perimeve është i lidhur fort me shëndet më të mirë mendor. Për më tepër, hulumtimi tregon se një mëngjes dhe drekë ushqyese janë të lidhur me mirëqenien emocionale, pavarësisht nga mosha.
“Më vjen mirë që ka kërkime që përqendrohen te fëmijët, tek ushqimi i mirë dhe efektet e tij në shëndetin mendor. Duket se ka më shumë stres dhe ankth te fëmijët tani, veçanërisht me pandeminë dhe të qenit në shtëpi për kaq kohë, larg bashkëmoshatarëve,” tha Audrey Koltun, e specializuar në endokrinologjinë pediatrike në Qendrën Mjekësore të Fëmijëve Cohen në New York.
Për të parë nëse zgjedhjet dietike mund të lidhen me shëndetin mendor, studiuesit përdorën sondazhe nga më shumë se 50 shkolla në Mbretërinë e Bashkuar. Në total, gati 11,000 nxënës përfunduan sondazhin (me 8,823 sondazhe të vlefshme). Hulumtimi zbuloi se nxënësit që hanin një ose dy porcione fruta dhe perime në ditë shënuan 1.42 njësi më të larta, ndërsa ngrënia e tre ose katër porcioneve tregoi një rritje prej 2.34 të njësive matëse për shëndetin mendor. Ata që hëngrën pesë ose më shumë porcione kishin një rezultat prej 3.73 njësi më të larta.
Autorët e studimit pranojnë se hulumtimi i tyre ka kufizime, përfshirë faktin se përgjigjet e sondazhit mund të jenë të pasakta. Megjithatë, kjo nuk do të thotë se nuk ka një lidhje mes frutave dhe perimeve dhe shëndetit mendor. Frutat dhe perimet janë të pasura me vitamina, minerale dhe fibra dhe sjellin një sërë përfitimesh fizike. Lidhja midis shëndetit fizik dhe shëndetit mendor është e njohur prej kohësh, përfshirë lidhjen midis një diete të shëndetshme dhe humorit.
