Kreu i Lëvizjes Vetëvendosje, Albin Kurti ka reaguar në lidhje me vendimin e Gjykatës Kushtetuese për mos vlefshmërinë e votën e deputetit Etem Arifi. Në një postim që ka bërë në Twitter ai ka shkruar se shpallja e ditës së zgjedhjeve të reja në Kosovë duhet që të zgjidhet sa më shpejt të jetë e mundur. Më poshtë ai shkruajti se është i bindur që do të marrë drejtimin e qeverisë së re dhe se është gati që të nisë punën si Kryeministër.
“Gjykata ka folur dhe ndërsa ne po presim vendimin përfundimtar, nuk duhet të vonohet shpallja e zgjedhjeve të reja për të rivendosur legjitimitetin në qeveri. Nga menaxhimi i pandemisë në rindërtimin e ekonomisë dhe reformimin e sistemit tonë të drejtësisë, ne kemi shumë punë për të bërë, por ne jemi gati,” shkroi ai.
Gjykata Kushtetuese e Kosovës, ditën e djeshme konstatoi se Qeveria e Kosovës, e udhëhequr nga Avdullah Hoti, është zgjedhur në mënyrë jokushtetuese.
Kjo, për shkak të votës së deputetit Etem Arifi, i cili, më 3 qershor, votoi për Qeverinë Hoti, ndonëse kishte një dënim të formës së prerë prej një viti e tre muajsh burgim, për veprën penale “mashtrim me subvencione”.
