Greqi- Deri më tani në pjesën veriore të Greqisë janë zbuluar tre raste të llojit të ri të koronavirusit, që thuhet të jetë më i transmetueshëm se origjinali. Lajmin e ka bërë të ditur Profesoresha e Departamentit të Mjekësisë në Universitetin Aristoteli të Selanikut, Anna Papa.
Siç raportojnë mediat vendase duke cituar ekspertët, dyshimet janë që në vend të ketë një numër më të madh rastesh me variantin “anglez” të koronavirusit.
Papa, e cila zbuloi shkurtin rastin e parë të koronavirusit në Selanik , është shprehur se ishte thjesht çështje kohe para se varianti i ri i Covid-19 të konfirmohej në Greqi.
“Llojet e reja të virusit që ka pësuar mutacion u identifikuan dy ditë më parë në laborator. Ne nuk u habitëm sepse ishte vetëm çështje kohe.., pasi që tashmë ishte bërë e ditur se ishte konfirmuar në Athinë dhe Kretë. Kjo është arsyeja pse kemi nevojë për vëmendje nga të gjithë ne, duhet t’i zbatojmë masat në mënyrë korrekte, ” u shpreh ajo.
Deri më tani, raportohet se në të gjithë vendin janë identifikuar 59 raste me variantin e Britanisë së Madhe.
