SHBA- Numërimi i votave vazhdon në disa shtete kyçe, duke e lënë të paqartë rezultatin edhe dy ditë pas zgjedhjeve. Kandidati demokrat, Joe Biden është para me votat në krahësim me Donald Trump, pas parashikimeve për fitoren e tij në Miçigen dhe Uiskonsin.
Me 16 votat elektorale të Miçigenit dhe 10 të Uiskonsinit, Biden ka 253 vota elektorale, përballë presidentit Donald Trump me 214 vota elektorale.
Fitimet në Arizona dhe Nevada, dy shtete të vëzhguara nga afër në mesin e atyre që ende numërojnë, do t’i jepnin Bidenit 270 votat e nevojshme elektorale.
Fitoret e Bidenit në Miçigen dhe Uiskonsin e lanë Trumpin, i cili i fitoi të dyja këto shtete më 2016, me më pak mundësi për të fituar.
Biden kryeson në Uiskonsin me 49.6 për qind, kundrejt Trumpit me 48.9 për qind. Një kandidat mund të kërkojë rinumërim nëse margjina e fitores është më pak se 1 për qind. Pas parashikimeve për fitore në Miçigan, Biden tha se pret që t’i fitojë zgjedhjet.
Xhorxhia dhe Pensilvania janë dy shtete të tjera që vëzhgohen nga afër e që ende vazhdojnë numërimin e votave. Trump është përpara në këto dy shtete.
