Babai i 20-vjeçares Caroline e cila u vra nga bashkëshorti, ka “shpërthyer” në zemërim ndaj Babis Anagnostopoulos. Ai ka deklaruar për mediat britanike se do ia kishte këputur kokën nëse do e dinte që në fillim që ai ishte vrasësi i vajzës.
David thotë se policia erdhi e mori bashkëshortin gjatë ceremonisë mortore të Carolines pasi kishin gjetur prova të reja që mund ta implikonin atë në vrasje.
“Kur e zbulova më vonë që ai ishte vrasësi, i vetmi peng që më ngeli është fakti që unë nuk e kuptova më parë. Do ia kisha këputur kokën aty në moment dhe do kisha vuajtur vetë pasojat” – tha David për mediat britanike.
Më tej, babai i 20-vjeçares thotë se lajmin e hidhur e mori vesh nga fqinjët në ishullin grek Alonissos.
“Nuk do ta harroj kurrë atë ndjesi. Mu duk sikur një dorë e akullt u fut brenda kraharorit tim dhe më hoqi zemrën nga vendi. Ishte dita ime më e keqe” – deklaroi ai.
Gjithashtu David beson disa prej artikujve të gazetave greke të cilat kanë shkruar se Babis dyshohet të jetë marrë me shitjen e lëndëve narkotike.
“Caroline kishte një parandjenjë të fortë dhe e kuptonte nëse diçka ishte e mirë ose e keqe. Ajo do e ketë zbuluar që i shoqi merrej me drogë, ndaj e kërcënonte se do divorcoheshin” – tha David.
