Shqiptarët shpenzuan mesatarisht më pak se 5900 lekë ose rreth 48 euro për prime sigurimi vitin e kaluar.
Të dhënat e Autoritetit të Mbikëqyrjes Financiare (AMF) tregojnë se primi mesatar për frymë pësoi rënie vitin e kaluar, me 4.9% më pak krahasuar me vitin 2019.
Primi për frymë kishte njëkohësisht vlerën më të ulët që prej vitit 2017. Arsyeja kryesore ishte rënia e volumit të primeve të sigurimit, si rrjedhojë sidomos e pandemisë së Covid-19. Statistikat e AMF treguan se vitin e kaluar tregu i sigurimeve pësoi rënie me 5.7%, e shtrirë në pjesën më të madhe të klasave të sigurimit të jetës dhe jo-jetës.
Tregu i sigurimeve edhe për vitin 2020 ruajti një shkallë të lartë të përqendrimit në Tiranë, ku janë regjistruar 59% e primeve të shkruara bruto. Përqendrimi i tregut në kryeqytet është i dukshëm edhe sipas primeve të sigurimit për frymë. Për Tiranën ky tregues vitin e kaluar arriti në rreth 10 800 lekë për frymë. Megjithë rënien me 6.5% krahasuar me një vit më parë, sërish primi i sigurimit për frymë në Tiranë është dy herë më i lartë krahasuar me qarkun e dytë në renditje, atë të Gjirokastrës. Në këtë qark, primi për frymë raportohet në vlerën e rreth 5500 lekëve. Vijojnë Qarku i Durrësit me rreth 4200 lekë për frymë dhe ai i Vlorës me afërsisht 4100 lekë për frymë. Në fund të renditjes janë qarku i Dibrës me rreth 2200 lekë prime sigurimi për frymë dhe ai i Kukësit me 2500 lekë për frymë.
Vlen të thuhet megjithatë se jo të gjitha qarqet e vendit pësuan një rënie të primeve të sigurimit për frymë vitin e kaluar. Qarqe si Shkodra, Lezha, Dibra dhe Kukësi shënuan një rritje të primit mesatar për frymë krahasuar me vitin 2019.
Shqipëria vazhdon të jetë një nga vendet me shpenzimet më të ulëta për prime sigurimi në Europë. Vitin e kaluar, Shqipëria është lënë pas edhe nga Kosova, ku primi mesatar i sigurimit arriti në 55 euro për frymë. Tregu shqiptar i sigurimeve që në fillesat e veta mbështetet në masën dërrmuese te sigurimet që janë të detyrueshme, për shkak të kërkesave ligjore ose për shkak të kushteve kontraktore të përcaktuara nga palët e treta, siç mund të jenë bankat, apo institucionet financiare. Për këtë arsye, edhe shumë prej sigurimeve që ligjërisht janë vullnetare, si për shembull sigurimi i pronës, i jetës së debitorit apo sigurimi Kasko i automjeteve, realisht në pjesën më të madhe shiten në formë të detyrueshme.
Vendi i Bashkimit Europian me shpenzimet më të ulëta për prime sigurimi është Rumania, me rreth 120 euro në vit, ndërsa në Zvicër primi mesatar për frymë arrin në rreth 7 mijë euro në vit. Mesatarja europiane vlerësohet në më shumë se 2 mijë euro për frymë në vit./E.Shehu
Marrë nga Monitor.al
